Saturday, August 25, 2012

കടല്‍പ്പാലത്തില്‍ തനിയെ.....
======================

ഓര്‍മ്മകള്‍ കടലെടുത്ത രാത്രിയില്‍
മോഹങ്ങള്‍ ഒഴിഞ്ഞു പോയ തീരത്ത്
ഞാന്‍ ഏകനായിരുന്നു...
കരുതി വെക്കുവാനൊന്നുമില്ലാതെ,
കാതുനില്‍ക്കുവാനാരുമില്ലാതെ
ജീവന്റെ ഇരുണ്ട സമതലങ്ങളിലേക്ക്
വേപഥുവോടെ ഉറ്റുനോക്കി
ഏകനായ് ഞാന്‍ .....

ഇന്നലെയുടെ ഇടവഴികള്‍ ശ്മശാനമൂകമായെങ്കിലും
ഇനിയും തകരാത്ത ആത്മവിശ്വാസത്തോടെ
തലയുയര്‍ത്തിനില്‍ക്കും കടല്‍പ്പാലത്തിന്റെ
വാര്‍ദ്ധക്യമേറും കൈപ്പിടികളില്‍
മുറുകെപ്പിടിച്ചു ഞാന്‍ എന്തിനോ വേണ്ടി....

അകലെ, പ്രകാശഗോപുരങ്ങള്‍
പുഞ്ചിരിക്കാന്‍ മറന്നുപോയിരുന്നു;
ഏതോ മണ്‍കുടിലില്‍ നിന്നുമുയര്‍ന്നിരുന്ന
പാട്ടിന്റെ അവസാനശ്രുതിയും നിലച്ചിരുന്നു...
ഉറങ്ങിവെളുക്കും പകലിനെ കണ്‍പാര്‍ത്ത്
എകനായിന്ന്‍ ഞാനിവിടെ...
അതെ, ഞാന്‍ ജീവിതക്കടല്‍പ്പാലത്തില്‍
തനിയെ ഇരിക്കുന്നവന്‍ !!